İtaliya koronavirus pandemiyasına qarşı mübarizə çərçivəsində infeksiya ocağına çevrilən regionlarda karantin tətbiq edəcəkdir.

Aztibb.az xəbər verir ki, İtaliyanın Baş naziri Cüzeppe Konte Parlamentin aşağı palatasındakı çıxışında hökumətin bir sıra məhdudlaşdırıcı tədbirləri barədə danışıb. O, qeyd edib ki, bütün ölkə səviyyəsində karantinin tətbiqinin qarşısını almaq və ölkə iqtisadiyyatını qorumaq üçün regional səviyyədə məhdudiyyətlərin gücləndirilməsi vacibdir.

Baş nazirin sözlərinə görə, yoluxmanın geniş yayıldığı regionlarda (hazırda Pyemont, Lombardiya və Toskana) karantin müddətində ticarət mərkəzləri həftə sonlarında bağlı olacaqlar. Ərzaq mağazaları, qəzet köşkləri və apteklərə bu qadağa şamil olunmayacaq. Eyni zamanda, muzey və sərgi salonları da həmin regionlarda fəaliyyət göstərməyəcək, eləcə də ictimai nəqliyyatda oturacaqların 50 faizi boş qalmalı olacaq.

Cüzeppe Konte, həmçinin qeyd edib ki, virusa yoluxmuş şəxslərin xəstəliyi yaymaması üçün infeksiya ocağı olan regionlara giriş-çıxış məhdudiyyəti də tətbiq edilə bilər.