Cərrah-transplantoloq Kamran Beydullayev - Peşəkar həkimlərimizi tanıyaq! - aztibb.az AZƏRBAYCANIN SƏHİYYƏ XƏBƏR PORTALI

Cərrah-transplantoloq Kamran Beydullayev - Peşəkar həkimlərimizi tanıyaq!

15.10.2026 13:00

Aztibb.az-ın “Həkimlərimizi tanıyaq!” rubrikasında Mərkəzi Gömrük Hospitalının Cərrahiyyə və Orqan Transplantasiyası şöbəsinin cərrah-transplantoloqu Kamran Beydullayevi təqdim edirik.

Kamran Beydullayev 1996-cı ildə Azərbaycan Tibb Universitetini fərqlənmə diplomu ilə bitirib. Ali tibb təhsilindən sonra ümumi cərrahiyyə üzrə internatura keçərək peşəkar fəaliyyətinə başlayıb.

2002–2007-ci illərdə Səudiyyə Ərəbistanında yerləşən Prince Nasir Bin Saad Al Sudairi Hospitalında cərrah-rezident kimi çalışıb. 2007-ci ildə imtahanları uğurla verərək İngiltərə Kral Cərrahlar Kollecinin ümumi cərrahiyyə diplomunu əldə edib.

Peşəkar inkişafını davam etdirən Kamran həkim 2008–2009-cu illərdə Türkiyənin İzmir şəhərində orqan transplantasiyası üzrə təlim keçib. Beynəlxalq təcrübə onun transplantasiya sahəsində bilik və bacarıqlarının daha da təkmilləşməsində mühüm rol oynayıb.

Kamran Beydullayev 2007–2018-ci illərdə özəl tibb müəssisəsinin Orqan Transplantasiyası şöbəsində həkim-cərrah kimi fəaliyyət göstərib. 2018-ci ildən etibarən isə Mərkəzi Gömrük Hospitalının Cərrahiyyə və Orqan Transplantasiyası şöbəsində cərrah-transplantoloq kimi çalışır.

O, Mərkəzi Gömrük Hospitalında canlı və meyit donordan böyrək və qaraciyər transplantasiyası, öd kisəsi və öd yollarının cərrahiyyəsi, mədəaltı vəzinin cərrahi müalicəsi, mədə, nazik və yoğun bağırsaq əməliyyatları, proktoloji əməliyyatlar, yırtıqların cərrahi müalicəsi, endokrin vəzilər və böyrəküstü vəzi əməliyyatlarını tibbi göstərişlərdən asılı olaraq açıq və ya laparoskopik üsulla icra edir.

Kamran Beydullayev Azərbaycanda ilk dəfə canlı donordan böyrək transplantasiyası əməliyyatlarında donorun əməliyyatını laparoskopik (qapalı) üsulla icra edərək ölkə səhiyyəsində mühüm yeniliyə imza atıb.

2025-ci ilin fevral ayında isə o, qaraciyər transplantasiyası zamanı meyit donordan qaraciyərin götürülməsi, daha sonra isə meyit donordan böyrəyin götürülərək canlı resipiyentə köçürülməsi ilə bağlı əməliyyatlarda iştirak edərək Azərbaycan səhiyyə tarixində mühüm bir ilkə imza atıb. Bu nailiyyətlər transplantologiya sahəsində müasir cərrahi yanaşmaların tətbiqi və orqan transplantasiyasının inkişafı baxımından xüsusi əhəmiyyət daşıyır.

O, müxtəlif elmi konfranslarda posterlərlə və elmi məruzələrlə iştirak edib, 20-yə yaxın elmi məqalənin müəllifidir. Həmçinin Avropa Orqan Transplantasiyası Cəmiyyətinin və Orta Şərq Orqan Transplantasiyası Cəmiyyətinin üzvüdür.

Kamran həkimin elmi fəaliyyətinin mühüm istiqamətlərindən biri də orqan transplantasiyası sahəsində beynəlxalq elmi təcrübənin öyrənilməsi və tətbiqidir. Onun həmmüəlliflərindən biri olduğu iki elmi məqalə ABŞ-ın nüfuzlu Elsevier nəşriyyatının çap etdirdiyi Transplantation Proceedings jurnalında dərc olunub.