Diabetdə qan şəkərinin səviyyəsini azaltmaq yalnız dərmanların köməyi ilə mümkün deyil. Arıqlamaq üçün xüsusi pəhrizlər və fiziki məşqlər də bu problemin müsbət həllinə kömək edir.

Aztibb.az “Journal of Biophotonics” (JB) jurnalında dərc olunan məqaləyə diqqət çəkib.

Bu yaxınlarda alimlər xəstəni qanda artıq şəkərdən təmizləmək üçün yeni, çox qeyri-adi üsul tapıblar.

2-ci tip diabetli insanlarda qan şəkərini azaltmağın alternativ yolunu axtarmaq üçün London Universitet Kollecinin alimləri fotobiomodulyasiyadan (aşağı səviyyəli lazer terapiyası) istifadə edərək təcrübə aparıblar. Tədqiqatda qanında qlükoza səviyyəsi yüksəlmiş 30 xəstə iştirak edib.

Könüllülər iki qrupa bölünüb. Onlardan birində iştirakçılar dalğa uzunluğu 670 nanometr olan qırmızı işığa məruz qalıblar. Digər xəstələr nəzarət qrupunda olduqları üçün oxşar prosedurdan keçməyiblər. Təcrübə başlamazdan əvvəl və sonunda bütün iştirakçılar üçün qan şəkərinin səviyyəsi qeydə alınıb.

Əldə edilən məlumatların müqayisəli təhlili göstərib ki, birinci eksperimental qrupdakı iştirakçıların qanında qlükoza konsentrasiyasının səviyyəsi ikinci kohortdan olan könüllülərlə müqayisədə orta hesabla 27,7% azalıb.

Alimlər müəyyən dalğa uzunluğunun qırmızı işığının mitoxondriləri - hüceyrə tənəffüsünə cavabdeh olan və onları enerji ilə təmin edən orqanoidləri aktivləşdirmək qabiliyyəti ilə yaranan təsiri izah ediblər. Mitoxondriya nə qədər aktivdirsə, emal olunan qlükoza miqdarı bir o qədər çox olur, bu da öz növbəsində qanda onun səviyyəsinin azalmasına səbəb olur.