Planeti plastiklə çirkləndirməmək üçün alimlər banandan istifadə etməyi təklif ediblər. Onlar daha tez parçalanır və təbiətə və insanlara zərər vermir.

Aztibb.az xəbər verir ki, alimlərin bununla bağlı araşdırmaları“Sustainable Chemistry and Pharmacy”jurnalında dərc edilib.

Məlumdur ki, adi plastik qablaşdırmanın torpaqda parçalanması yüz illər çəkəcək. Təkrar emala baxmayaraq, çoxlu plastik zibilliklərdə, sonra torpaqda, okeanda və canlı orqanizmlərin daxilində qalır. Ətraf mühitə və insan sağlamlığına ziyanı nəzərə çarpır.

Cənubi Dakota Universitetinin amerikalı alimləri plastik qablaşdırmaya ucuz alternativ - banan qabığı təklif ediblər. Emal zamanı ondan bioloji parçalana bilən material yaratmaq üçün liqnoselülozik lifin çıxarılması tələb olunur.

Elmi təcrübədə banan qabıqlarını blenderlə əziblər, kimyəvi üsulla liqnoselüloz çıxarıblar. Sonra liflər ağardılıb və qurudulub. Yaranan material gücü, suya davamlılığı, şəffaflığı və elastikliyi baxımından plastikdən geri qalmır. Eyni zamanda, daha sürətli parçalanır. Bir ay ərzində zərərli və ya təhlükəli məhsullar əmələ gəlmədən torpaqda 90% parçalanır.

Tədqiqatçılar hesab edirlər ki, yeni material sayəsində plastikin 40%-ə qədəri dəyişdirilə bilər. Hazırda onlar qabıqdan alınan materialın performansını yaxşılaşdırmağa və onun necə kommersiyalaşdırıla biləcəyini başa düşməyə çalışırlar.