Yorğunluq, ürəkbulanma, iştahsızlıq, kilo itkisi, qarın ağrısı, çaşqınlıq və diqqətsizlik kimi simptomlar qaraciyər yağlanmasının əlamətləri ola bilər. Bu mövzuda mühüm məlumatlar verən dr. İlksoy İkibiroğlu, yağlı qaraciyərin sağlamlığa əhəmiyyətli təsir göstərə biləcəyini deyib.

Aztibb.az “CNN Türk”ə istinadən xəbər verir ki, həkim qaraciyərin bədəndəki qidaları idarə etdiyini, zərərli maddələri ayırdığını və xaric olmasını təmin etdiyini açıqlayıb. Buna görə də sağlam qaraciyər ümumi sağlamlıq vəziyyətini qoruyur. Lakin o, qaraciyərin yağlanmasının bu tarazlığı poza biləcəyini bildirib.

Qaraciyərin yağlanmasına işarə edən simptomların daimi halsızlıq və yorğunluq, ürəkbulanma, iştahsızlıq, kilo itkisi, qarın ağrısı, çaşqınlıq və diqqətsizlik olduğunu ifadə edən həkim, ağız qoxusu və bədən qoxusu, şişkinlik, hemoroid, bədən istiliyinin artması, gözlərdə və ovuclarda qızartı, dəridə qaşınma və səpki kimi simptomların da qaraciyərin yağlanmasına işarə etdiyini vurğulayıb.

Qaraciyər yağlanmasının qarşısını almaq üçün alına biləcək tədbirlər sırasında spirt istifadəsinin məhdudlaşdırılması və kilo nəzarəti əhəmiyyətlidir. Həkim bu mənada həddindən artıq kalori ehtiva etməyən, doymuş və trans yağları az olan qida ilə zəngin bir pəhriz tövsiyə edib.