Sağ və sol əlləri birlikdə istifadə etməyi öyrənməyin beyin funksiyalarını yaxşılaşdıracağı fikri bir mifdir.

Aztibb.az “TRT Haber”ə istinadən xəbər verir ki, bu fikri neyropsixoloq İnci Birioğlu bildirib.

Qeyd edib ki, beynin müəyyən funksiyalar üçün təkamüllə ixtisaslaşmış sahələri var. Bu sahələr bir-biri ilə qarşılıqlı əlaqədə olur və daha təkmil funksiyalar yaradır:

“Təkamül baxımından, beynin sol yarımkürəsinin üstünlüyü və dilin və sağ əlin bacarıqlı motor hərəkətləri üçün ixtisaslaşması beyində tapşırıqların sürətli və iyerarxik paylanması üçün vacibdir. Digər tərəfdən, çox mühüm məqam ondan ibarətdir ki, doğuşdan solaxay olan uşağın sağ əli ilə qələm tutmağa məcbur edilməsi sinir-inkişaf prosesində müxtəlif diqqət, yaddaş və düşünmə çətinliklərinə səbəb ola bilər”.

Sağ əlli insanların 95 faizində danışma, yazma, oxuma, anlama, təkrarlama və adlandırma kimi dil funksiyaları sol yarımkürə tərəfindən təşkil edilir. Sağ yarımkürə vizual-məkan funksiyaları və diqqət prosesləri üçün ixtisaslaşmışdır.