Liverpul Universitetinin alimləri COVID-19-un insan beyninə təsirini araşdıran tədqiqat aparıblar. Məlum olub ki, koronavirusa yoluxmuş bəzi xəstələrdə beyində ciddi travmatik beyin zədəsinin nəticələrinə bənzəyən xarakterik dəyişikliklər var.

Aztibb.az xəbər verir ki, müvafiq hesabat “EclinicalMedicine” jurnalında dərc olunub.

Koqnitiv test və beyin skanları göstərib ki, beynin diqqətə cavabdeh olan müəyyən hissələri həcmcə kiçilib. Və qan testlərinin biomarkerləri xəstənin bir dəfə travmatik beyin zədəsi alması kimi görünüb. Bu vəziyyət beynin 20 yaş qocalmasına və ya 10 İQ balının itirilməsinə bərabərdir.

Bu cür beyin dəyişikliklərinin qalıcı və ya müvəqqəti olacağı hələ dəqiq deyil. Lakin onlar xəstələr sağaldıqdan sonra altı ay ərzində qeydə alınıb. Gələcəkdə işin müəllifləri bu vəziyyətin müalicəsinin effektiv üsullarını yaratmaq üçün bu fenomeni öyrənməyə davam edəcəklər.