Cinsi yolla keçən xəstəliklər qorunmayan cinsi əlaqədə olan hər kəs üçün təhlükə yaradır.
Aztibb.az “Medzdrav.info”ya istinadən xəbər verir ki, ginekoloq Yelena Bliznyuk bununla bağlı müsahibəsində xəbərdarlıq edib. Onun sözlərinə görə, qadınlarda qonoreya və sifilisin müəyyən edilməsi çox çətindir.
Mütəxəssis bildirib ki, 70% hallarda qadınlarda süzənək gizli xarakter daşıyır və aşkar simptomlar olmadan baş verir. Eyni zamanda həkim xəbərdarlıq edib ki, doğuş zamanı qonoreya qadından uşağa keçə bilər.
Sifilisə gəldikdə, müvafiq testlər aparılmazsa, onu tanımaq çox çətindir. Ginekoloq qeyd edib ki, inkişafın ikinci mərhələsinə çatana qədər çox vaxt xəstəlikdən şübhələnilmir.
Əlavə edib ki, xlamidiya xüsusilə qadınlarda gizli şəkildə də baş verir. Əsas təhlükə xəstəliyin xroniki formaya keçməsidir.
Dünyada yayılmış bir infeksiya olan insan papillomavirusu da tamamilə asemptomatikdir. Bu xəstəlik vaxtında aşkarlanmadıqda uşaqlıq boynu və digər orqanların xərçənginə səbəb ola bilər.
“HİV kimi təhlükəli xəstəliyi dərhal tanımaq çox çətindir. İnfeksiyanın ilkin mərhələsində bir insan qripə bənzər simptomlarla qarşılaşır. Sonra uzun illər davam edə bilən asimptomatik dövr gəlir”, - deyə həkim yekunlaşdırıb.