Ağrılı Morton nevroması riski təkcə qaçışçılar üçün təhlükəli deyil, həm də idmanla məşğul olan qadınlara da təsir edə bilər, xüsusən də gündəlik həyatda ayaq barmaqları daralmış hündürdaban ayaqqabı geyinməyə alışmışlarsa.

Aztibb.az “Medzdrav.İnfo”ya istinadən xəbər verir ki, mütəxəssislərin bildiridiyinə görə, müsbət cəhətlərdən başqa, qaçmaq ciddi nəticələrə səbəb ola bilər. Həkimlər idmana düzgün seçilmiş idman ayaqqabısı ilə başlamağı məsləhət görürlər.

Xüsusilə, qaçan və ya idmanla məşğul olan orta yaşlı qadınlarda Morton nevroması inkişaf riski var. Xəstəlik ayaq barmaqları arasında, metatarsal sümüklərin başları nahiyəsində təxminən 0,5 sm enində və 1,5 sm uzunluğunda sıx qalınlaşma kimi özünü göstərir.

Ortoped həkim Vladimir Neçayev izah edib ki, Morton nevroması plantar sinirlərin mexaniki sıxılması nəticəsində yaranır. Ayaq boyunca uzanan, xüsusən üçüncü və dördüncü barmaqlar arasındakı bölgədə sinir üzərində uzun müddətli təzyiqlə, ağrılı şişlik və nevromanın meydana gəlməsi ilə müşayiət olunan iltihablı bir proses meydana gəlir.

Ayaqlarda statik və dinamik yüklər bu xəstəliyin inkişafına kömək edir. Birincisi, uzun müddət dayanma zamanı, xüsusən də düzgün olmayan yerişlə baş verə bilər. Dinamik yüklər qaçış və uzun gəzintiyə aiddir, ön ayağı daim sərt səthə vurur, bu da sinirlərin sıxılmasına və iltihabına səbəb olur.