Məşq xərçənglə əlaqəli yorğunluğu və apatiyanı azaltmağa kömək edir

İdman insanlara xərçəng müalicəsi zamanı xroniki yorğunluğun öhdəsindən gəlməyə kömək edə bilər.

Aztibb.az xəbər veerir ki, bunu Britaniya Kolumbiyası Universitetinin (UBC) saytına müsahibəsində universitetin Tibb Fakültəsinin Fizioterapiya kafedrasının professoru Kristin Kempbell deyib.

Həkim xərçəngin müalicəsi zamanı idmanın əsas faydalarından birinin xəstəliklə bağlı yorğunluğun aradan qaldırılması olduğunu bildirib. O, izah edib ki, apatiya və yorğunluq müalicənin yan təsirləri və ya xərçəngin özünün nəticəsi ola bilər. Fiziki fəaliyyət həmçinin narahatlığı azaltmağa, əməliyyatdan sonra hərəkətliliyi və və xəstələrin həyat keyfiyyətini yaxşılaşdırmağa kömək edə bilər.

Həkim onu da qeyd edib ki, fiziki fəaliyyət istənilən formada faydalı ola bilər. İdmanla məşğul olmağa alışmaq üçün hər gün ən azı beş dəqiqə sürətli templə yeriməklə başlaya bilərsiniz.

Xərçəng müalicəsinin yan təsirlərini idarə etmək üçün professor həftədə üç dəfə ən azı 30 dəqiqə aerobik məşq etməyi, məsələn, sürətli gəzinti etməyi tövsiyə edir. Böyük əzələ qruplarını hədəf alan güc məşqləri də edə bilərsiniz.

Mütəxəssis vurğulayıb ki, məşq cədvəli mütləq iştirak edən həkimlə razılaşdırılmalıdır.