Milan Universitetinin epidemiologiya üzrə italyan professoru Carlo La Vecşia bildirib ki, gənclər arasında yeni bağırsaq xərçəngi hallarının sayının artmasının əsas səbəbləri arasında spirt istehlakının artması və artıq çəki, eləcə də fiziki fəaliyyətin olmaması daxildir.

Aztibb.az “Medzdrav İnfo”ya istinadən xəbər verir ki, mütəxəssisin sözlərinə görə, 2024-cü ildə 25-49 yaş arası insanlar arasında xərçəngin bu növündən ölüm hallarının artacağı gözlənilir. Professor piylənmə ilə bağırsaq xərçənginin inkişafı və buna bağlı olan xəstəliklər, məsələn, yüksək insulin müqaviməti, prediabet və şəkərli diabet arasında əlaqəni qeyd edir.

"Əlavə səbəblər Avropa və Böyük Britaniyada alkoqol istehlakının tədricən artması, həmçinin fiziki fəaliyyət səviyyəsinin əhəmiyyətli dərəcədə azalmasıdır", – deyə həkim qeyd edib.

Bildirilib ki, spirt istehlakının azaldığı ölkələrdə, məsələn, İtaliya və Fransada bağırsaq xərçəngindən ölənlərin sayının artacağı gözlənilmir. Eyni zamanda vurğulanıb ki, gənclərdə bağırsaq xərçəngi əksər hallarda yaşlı xəstələrə nisbətən daha sürətli inkişaf edir və daha aqressiv formada baş verir.