Merilend Universitetinin (ABŞ) tədqiqatçıları sidiyin sarı rənginin sirrini açan heyrətamiz nəticəyə gəliblər.

Aztibb.az xəbər verir ki, “Nature Microbiology” jurnalında dərc olunan məqalədə elm adamları bu prosesdə əsas rol oynayan əvvəllər məlum olmayan mikrob fermentinin kəşf edildiyini açıqlayıblar.

İnsan bağırsaq mikrobiotasında bilirubin reduktaza (BilR) adlı mikrob fermenti tapılır. Onun əsas funksiyası ölü qırmızı qan hüceyrələrinin parçalanması zamanı yaranan narıncı piqment olan bilirubini parçalamaqdır. Bilirubinin rəngsiz urobilinogenə, sonra isə sarımtıl urobilinə çevrilməsi prosesi sidiyi xarakterik rəngini verir.

Tədqiqat bilirubin mübadiləsinin insan orqanizmində və onun bağırsaq mikrobiotasında sağlamlığın qorunması üçün əhəmiyyətini vurğulayır. Həddindən artıq bilirubin sarılıq və nevroloji pozğunluqlar kimi ciddi nəticələrə səbəb ola bilər.

Alimlər bağırsaq mikrobiotasında BilR-ni müəyyən etmək üçün biokimyəvi analiz və müqayisəli genomik üsullardan istifadə ediblər. Fermentin identifikasiyası bilirubinin azalması üçün kritik olan əsas qalıqların təcrid edilməsi ilə həyata keçirilib. BilR-nin əsasən Firmicutes növləri tərəfindən kodlandığı aşkar edilib.

Maraqlıdır ki, insan bağırsaq metagenomlarının təhlili BilR-nin sağlam yetkinlərdə geniş yayıldığını, lakin yenidoğulmuşlarda və iltihablı bağırsaq xəstəliyi olan şəxslərdə onun səviyyəsinin azaldığını göstərib.

Bu kəşf bilirubin mübadiləsi ilə bağlı yeni müalicə üsullarına və sağlamlıq yanaşmalarına işıq tuta bilər və insan orqanizmindəki mürəkkəb münasibətləri anlamaqda mühüm addımdır.