Xanımlar, fiziki bədəniniz ruhunuzun evidir. Onu düzgün bəsləyin, istədiyiniz kimi zədə verərək düzəltməyə ixtiyarınız yoxdur.

Aztibb.az xəbər verir ki, bu fikirləri Bioloji Təbabət Klinikasının uşaq həkimi Aytən İsmayılzadə sosial şəbəkədə paylaşıb.

Aytən İsmayılzadə qeyd edib ki, mədə bir orqan olaraq sadəcə yemək kisəsi deyil. Mədənin hissələri bir-birini təkrar etmir və hər tərəfi müəyyən hormon, maddələr buraxır. Mədənin cismi, dibi, girişi, çıxışı, əyrilikləri fərqlidir. Bağırsaq təkrarlana bilir, onun kəsilib tikilməsi ilə mədə eyni deyil. Əməliyyatın adı isə mədəkiçiltmə yox, mədə kəsilmə olmalıdır. Çünki, sadəcə mədə kiçilmir, mədə kəsilərək dəyişir. Və bu dəyişən orqan artıq mədə olmur.

“Biz mədəmizi ancaq onu və özümüzü qorumaq məqsədilə kəsdirə bilərik. Məsələn, mədə xərçəngi zamanı. Öz görünüşümüzə görə deyil. Xalqıma xas toppuş qızların mədəsini kəsməyə əlini bulaşdıran həkimlərə nə deməli? Bu faciədir! Buna aid sosial şəbəkədə çoxlu sayda reklam şəkilləri var. Öncə və sonrası çox da fərqlənməyən şəkillər. Səhiyyə sistemindən isə biri çıxıb buna "dur" demir. Belə işlərə görə o cür həkimlərə ümümiyyətlə əməliyyat qadağan edilməlidir”, - deyə həkim vurğulayıb.