Onkoloq Beslan Balkarov bildirib ki, statistik məlumatlara görə, mədə xərçənginə qadınlara (42%) nisbətən kişilərdə (təxminən 58%) daha çox rast gəlinir.
Aztibb.az “Gazeta” nəşrinə istinadən xəbər verir ki, bu, təhlükəlidir, çünki ilkin mərhələdə gizli - heç bir əlamət olmadan baş verə bilər.
Həkimin sözlərinə görə, bu, genetik meyldir. Yəni söhbət yaxın qohumlarda mədə xərçənginin olması və xəstəliyin genlər vasitəsilə ötürülməsindən gedir.
“Bu xəstəliklə birbaşa və ya dolayısı ilə əlaqəli bir neçə irsi patologiya var: diffuz mədə xərçəngi CDH1 genindəki mutasiya nəticəsində inkişaf edir və bu, həyat boyu xəstəliyin inkişaf riskini 80%-ə qədər artırır”, - deyə həkim bildirib.
O qeyd edib ki, MLH1 və ya MSH2 genində mutasiya ilə inkişaf edən və mədə xərçənginin inkişafının əsas amillərindən biri olan polipsiz kolorektal xərçəng (HNPCC) də var. Proksimal mədə polipozu (mədədə çoxlu poliplər) APC genindəki mutasiyalar nəticəsində baş verir və mədə xərçənginin inkişaf riskini artırır.
Onkoloq əlavə edib ki, digər risk faktoru mədənin pilorik hissəsində yaşayan ən təhlükəli bakteriyalardan biri olan Helicobacter pylori bakteriyası ilə mədənin kolonizasiyasıdır.
Bundan əlavə, onkoloq mədə xərçənginin inkişaf riskini hisə verilmiş, qızardılmış, duzlu, ədviyyatlı və konservləşdirilmiş qidaların həddindən artıq istehlakı ilə əlaqələndirir.