İngiltərə Heyvan və Bitki Sağlamlığı Agentliyi (APHA) Antarktidadakı suitilərin quş qripinə tutulduğunu və öldüyünü açıqlayıb.

Aztibb.az “CNN Türk”ə istinadən xəbər verir ki, APHA bu gün dərc etdiyi hesabatda yüksək patogenli quş qripinin (HPAI) Antarktidanın cənubundakı Cənubi Corciya adasında suitilərin ölümünə səbəb olduğunu bildirib.

APHA ilk məlum hadisələrin 2023-cü ilin oktyabrında qəhvəyi skua adlı quş növlərində meydana gəldiyini və xəstə quşlardan alınan nümunələr nəticəsində virusun Cənubi Amerikadan köçəri quşlardan keçdiyini təxmin etdiklərini açıqlayıb.

APHA Quş Virusologiyası qrupunun alimi Marko Falçieri bildirib ki, üç həftəlik araşdırmadan sonra bölgədəki demək olar ki, bütün suitilərdə quş qripi əlamətləri müşahidə olunub və təxminən 20 suiti ölüb. Bildirilib ki, əlamətlər arasında öskürək, asqırma, gözdən axıntı, burundan axıntı, başın yavaş yellənməsi və titrəmə var.

Qeyd edilib ki, quş qripi sub-Antarktika bölgəsində yayılmağa davam edərsə, o, kövrək ekosistemi əhəmiyyətli dərəcədə təhdid edə bilər və potensial olaraq dəniz quşları və dəniz məməlilərinin böyük populyasiyasını risk altına qoya bilər. Bununla belə, mövcud məlumatlar virusun geniş yayılmış adaptasiyasının olmadığını deməyə əsas verir.