Ukraynada son sutkada yeni növ koronavirusa (COVID-19) yoluxma və bu virusdan ölüm hallarında yeni antirekord qeydə alınıb.

Aztibb.az Ukrayna Səhiyyə Nazirliyinə istinadla xəbər verir ki, ötən gün ölkədə 173 nəfər koronavirusdan həyatını itirib. Bununla da bu infeksiyadan ölənlərin ümumi sayı 7041 nəfərə çatıb.

Ötən gün Ukraynada 8312 nəfər koronavirusa yoluxub. Bununla da pandemiya dövründə Ukraynada koronavirusa yoluxanların sayı 378 min 729-a çatıb, 155 min 26 nəfər müalicəsini başa vurub. Ən çox yoluxma halları Kiyev, Odessa, Xmelnitski, Lvov və Xarkov vilayətlərində qeydə alınıb.

Qeyd edək ki, Ukraynada koronavirusla bağlı vəziyyət pisləşdiyindən karantin müddəti dekabrın 31-dək uzadılıb və karantin şərtləri sərtləşdirilib.

Gürcüstanda son sutka ərzində COVID-19-a 1 696 yoluxma halı qeydə alınıb, 12 nəfər ölüb.

Bununla da qonşu ölkədə koronavirusa yoluxanların sayı 37 263 nəfərə, ölənlərin sayı 285 nəfərə çatıb. Koronavirusa yoluxanlardan 19 810 nəfərin sağaldığı bildirilir.

Ermənistanda son sutka ərzində koronavirus infeksiyasına 2 398 yoluxma halı qeydə alınıb, 28 nəfər ölüb. Ölkədə koronavirusa yoluxanların sayı 87 432 nəfərə çatıb, ölənlərin sayı 1 300 nəfərdir.

Xəstəlikdən sağalanların sayı 54 316 nəfər təşkil edir.