İsveçdən olan bir qrup alim 35 illik fundamental araşdırma nəticəsində yüz yaşlıların qan tərkibinin xüsusiyyətlərini aşkarlayıb.
Aztibb.az bu barədə “GeroScience” nəşrinə istinadən yazır ki, mütəxəssislər 64+ yaş qrupunda olan 44 mindən çox insanın qanını araşdırıb.
Ümumdünya Səhiyyə Təşkilatının təsnifatına əsasən, uzunömürlülərə 90 yaş həddini keçmiş yaşlı insanlar daxildir.
Tədqiqatçılar qan tərkibini ümumi xolesterin, sidik turşusu səviyyələri, qlükoza və qaraciyər funksiyası ilə bağlı markerlər üçün təhlil ediblər. Bundan əlavə, anemiyanın mövcudluğunu göstərən böyrək funksiyası, dəmir və ümumi serum dəmiri bağlama qabiliyyəti (TİBC) ilə əlaqəli kreatinin səviyyələri, həmçinin biomarker olan albumin (sadə suda həll olunan zülallar) təhlil edilib.
Araşdırma nəticəsində məlum olub ki, 100 yaşına çatmış insanlarda kreatin, şəkər və sidik turşusu ən aşağı səviyyədədir. Eyni zamanda, sidik turşusu səviyyəsi ən aşağı olan insanların 100 yaşa qədər yaşama şansı 4% idi və ən yüksək səviyyəyə malik olan subyektlərin yalnız 1,5% -i bu yaşa çata bilib.
Elmi nəticəyə görə, bu biomarkerlər alkoqoldan tam imtina və sağlam pəhrizin olması ilə əlaqələndirilir. Tədqiqat təsdiq edib ki, biomarker səviyyələrində əks olunan genetik faktorlar da uzunömürlülükdə mühüm rol oynaya bilər.