Stanford Universitetinin Tibb fakültəsinin alimləri insan orqanizmində hansı orqanın digərlərindən daha tez qocaldığını müəyyən etməyi öyrəniblər.

Aztibb.az bu barədə “Nature” elmi jurnalına istinadən məlumat verir.

Alimlər beş min könüllü arasında araşdırma apararaq belə nəticəyə gəliblər ki, yaşı 50-dən yuxarı olan hər beşinci insanda digərlərindən daha tez qocalan orqan var. Bədənin bu "ən zəif halqası" bir neçə il ərzində ciddi xəstəliyə və hətta insanın ölümünə səbəb ola bilər.

Tədqiqatçıların fikrincə, belə orqanlar 15 il ərzində vaxtından əvvəl ölüm riskini 15-20% artırır. Məsələn, ürəyin sürətlə qocalması səbəbindən ürək çatışmazlığı riski 2,5 dəfə artır. Beynin vaxtından əvvəl qocalması səbəbindən insanın idrak qabiliyyəti beş il ərzində iki dəfə azaldıla bilir.

Alimlər müxtəlif insan orqanlarının bioloji yaşını təyin etmək üçün alqoritm hazırlayıblar. Bunun üçün qan testi etmək və zülalların səviyyəsini təhlil etmək kifayətdir.