Argentinada atlar və insanlara təsir edən və ağcaqanadlar tərəfindən ötürülən nadir bir xəstəlik olan Qərb at ensefaliti ilə insan yoluxma halı qeydə alınıb.

Aztibb.az bu barədə TASS-a istinadən xəbər verir ki, Santa Fe əyalətindən xəstəxanaya baş ağrısı, əzələ ağrısı, başgicəllənmə və oriyentasiyanın pozulması şikayəti ilə müraciətlər edilib. Xəstələr şiddətli qızdırmadan əziyyət çəkib.

Argentinada at ensefaliti ilə bağlı sonuncu hadisə 1996-cı ildə qeydə alınıb və ondan əvvəl isə 1982-1983-cü illərdə infeksiya ocaqları müşahidə olunub.

Hazırda ölkədə 12 əyalətdə atlarda 1182 xəstəliyə yoluxma halı müəyyən edilib. Virus insanlar üçün təhlükəlidir və quşlar və həşəratlar vasitəsilə ötürülür. Kənd yerlərində yaşayan və açıq havada heyvanların yanında işləyən insanlar xüsusilə həssasdırlar.