XXI əsrdə insanlar əməyin avtomatlaşdırılması ilə əlaqədar getdikcə daha çox zamanının böyük hissəsini oturaq vəziyyətdə keçirir. Ofis işi, tıxaclarda saatlarla qalmaq, asudə vaxtlarınızda televizor və ya kompüter qarşısında saatlarla oturmaq.

Aztibb.az xəbər verir ki, Ümumi Cərrah-Fleboloq Emin Hüseynovun bildiridiyinə görə, bütün bunlar ürək-damar sisteminin pozulması, oynaq ağrısı, piylənmə və bir çox digər xəstəliklərə fon yaradır. Hipodinamiya (hipokineziya) - uzun müddətli hərəki aktivliyin olmaması ilə səciyyələnən bir haldır.

Həkim qeyd edib ki, hipodinamiya potoloji və funksional olaraq iki yerə bölünür.

Potoloji hipodinamiya zamanı xəstəlik səbəbindən uzun müddət məcburi yataq rejimində olan xəstələrdə, travma ilə əlaqədar olaraq uzun müddətli hərəkət məhtudluğu olan insanlarda, funksional hipodiamiya isə daimi oturaq həyat tərzi keçirən insanlarda (ofis işçiləri və s.) rast gəlinir.

Uzunmüddətli hərəki məhtudluq nəticəsində bir çox orqan və sistemlərin fəaliyyəti, qan və limfa dövranı pozulur. Bütün bunlar, funksional sistemlərin - homeostazın pozulmasına səbəb olur.

Araşdırmalara görə, fiziki fəaliyyətin məhdudlaşdırılması bütün orqan və toxumaların fəaliyyətinin zəifləməsinə gətirib çıxarır. Potoloji hipodinamiya ilə mübarizədə uzunmüddətli reabilitasiya əvəzolunmaz bir vasitədir.

Həkim bildirib ki, reabilitasiyanın ilkin əsas şərti fiziki yükün tədricən artırılmasından ibarətdir. Reabilitasion hərəkətlər bütün dayaq-hərəkət sisteminin güclənməsinə, əzələlərdə və orqanlardakı qan dövranının yaxşılaşdırılmasına və psixo-emosional vəziyyətin normallaşmasına yönəldilib.

“Yadda saxlamaq lazım ki, funksional hipodinamiyanın əsas profilaktikası daimi aktiv hərəkətdir. Müxtəlif fiziki hərəkətlər və idman hərəkətləri əzələ sistemini və dayaq – hərəkət sistemini və bütünlüklə bütün bədəni möhkəmləndirir. Daimi olaraq gündəlik yürüyüş, qaçış, üzgüçülüklə məşqul olmaq, fitnes dərsləri belə sizin sağlamlığınıza müsbət təsir edəcəkdir”, -deyə ekspert vurğulayıb.