Spondilolistez fəqərə sürüşməsi olub onurğanın qeyri-sabitliyini ehtiva edən bir vəziyyətdir. Bu da fəqərələrin lazım olduğundan daha çox hərəkət etməsi deməkdir. Çünki bir fəqərə yerindən aşağıda olan fəqərənin üzərinə sürüşür.

Aztibb.az xəbər verir ki, uzman travmatoloq-ortoped Məzahir Ağazadənin sözlərinə görə, bir sinirə ani təzyiq göstərilməsi bel və ya ayaq ağrısına səbəb ola bilər.

Qeyd edib ki, onurğanın həddindən artıq uzanması gənc idmançılarda spondilolistezin əsas səbəblərindən biridir: “Burada genetik amil də rol oynaya bilər. Bəzi insanlar daha nazik onurğa sümüyü ilə doğulur. Yaşlı insanlarda onurğanın və disklərin aşınması (vertebralar arasındakı yastıqlar) bu vəziyyətə səbəb ola bilər. Fəqərə sürüşməsi müalicəsi, sürüşmə dərəcəsinə, simptomlara, xəstənin yaşına və ümumi sağlamlığına bağlıdır”.

Pasiyentdə yüksək dərəcəli spondilolistez (fəqərə sürüşməsi) varsa, ağrı şiddətlidirsə və ya cərrahi olmayan müalicələri sınanıbsa, ortoped-travmatoloq cərrah əməliyyat tövsiyə edə bilər.

Həkim spondilolistez cərrahi müalicəsinin məqsədlərini sadalayıb:

- Qıcıqlanmış sinirdən ağrıların aradan qaldırılması,
- Fəqərə sürüşməsi olan yerdə onurğa sütununu sabitləşdirilməsi,
- Onurğa funksiyasının bərpa edilməsi.