Bir çox xəstələri bu sual maraqlandırır: "Varikoz damar əməliyyatından sonra damarların yenidən çıxma ehtimalı varmı?"

Aztibb.az xəbər verir ki, sualla bağlı cərrah-fleboloq Möhsüm Əsgərov fikirlərini bildirib.

Varikozun aradan qaldırılması üçün ən müasir və effektiv üsul genişlənmiş damarların lazerlə müalicəsidir.

Bəzən həkim-fleboloqlar xalq təbabəti üsullarından yararlanmaqla orqanizmə fayda vermək əvəzinə, əksər hallarda təhlükəli ağırlaşmalara səbəb olurlar. Xalq təbabəti üsulları ilə anatomik olaraq öz funksiyasını itirmiş damarların aradan qaldırılması baş vermədiyi üçün bu üsullar yalnız səthi müalicə hesab edilir. Mütləq müalicə etməzdən əvvəl bir həkim-fleboloqla məsləhətləşmək tövsiyə olunur.

Hazırda tibbin geniş imkanları sayəsində varikoz damarlar kəsik aparılmadan, narkoz verilmədən, həmçinin yataq rejimi olmadan çox rahatlıqla yox edilir.

Əməliyyatdan sonrakı dövr müddətində müəyyən qaydalara riayət edilərsə, varikoz damar problemi yenidən yaranmır. Ancaq başa düşmək lazımdır ki, yalnızca cərrahi müdaxilənin olduğu damarlar yenidən genişlənmir. Yəni əməliyyatdan sonrakı dövrdə genişlənmiş damarların boşluğu olmur və onlar ancaq nazik iplər kimi görünürlər. Beləliklə, bu damarlar vasitəsilə qan axını baş vermir. Buna görə əməliyyat sonrası dövrlərdə təkrarən damarların genişlənməsi hadisəsi olmur.