Müasir dövrdə uşaqlarda onurğa əyriliklərinın, skoliozun rast gəlmə tezliyi xeyli artmışdır. Bu dəyişikliklər əsasən yeniyetməlik dövründə başlayır və uşaqların onurğasına düşən yük, həyat tərzinə uyğun olaraq arta bilir.

Aztibb.az-a “Caspian International Hospital"dan verilən məlumata əsasən, uşaqların məktəb yükü, daşıdıqları çantalar, davamlı olaraq telefon istifadəsi onurğa əyriliklərinin geniş yayılmasına səbəb olub. Bundan başqa, genetik faktorlar, əzələ zəifliyi, müxtəlif travmalar onurğa əyriliklərinə gətirib çıxarır.
⠀
Valideynlər onurğa əyriliyindən necə şübhələnə bilərlər?

• Çiyinlərin müxtəlif hündürlükdə olması,
• Onurğanın yana əyilməsi,
• Qabırğaların önə çıxması,
• Kürəkdə gözə çarpan əyrilik və çanaqda assimetrik görüntü həkimə müraciət etmək üçün vacib əlamətlərdir.

Onurğa əyriliklərinin diaqnostikası həkim müayinəsi, rentgen və MRT kimi müayinə üsulları tətbiq olunaraq aparılır.

Uşaqlarda onurğa əyriliklərinin müalicəsi uşağın yaşı, onurğanın əyrilik dərəcəsi, ümumi sağlıq vəziyyətinə əsasən təyin olunur. Hazırda müasir fizioterapevtik metodlar onurğa əyriliklərini uğurla müalicə etməyə və müsbət nəticələr almağa kömək edir.