Ağız-udlağın xərçənginə öpüşmə zamanı yayılan insan papillomavirusu (HPV) səbəb ola bilər.

Aztibb.az “İzvestiya” qəzetinə istinadən xəbər verir ki, bu barədə onkocərrah, kimyaterapevt Anton İvanov danışıb.

“Son illərdə ağız-udlaq xərçənginin əsas səbəbi HPV, xüsusilə 16 və 18-ci tiplərdir. Bunlar yüksək onkogen riskli viruslardır. Üstəlik, HPV-müsbət xərçəng hər iki cinsdən olan siqaret çəkməyən gənclərdə daha çox rast gəlinir”, - deyə həkim bildirib.

Mütəxəssisin qeyd etdiyi kimi, çoxlu sayda cinsi partnyoru olan insanlar xüsusilə risk altındadır. Bir öpüş və ya qorunmayan oral seks yoluxmaq üçün kifayətdir.

HPV-nin həmişə xərçəngə səbəb olmadığını vurğulamaq lazımdır. Yetkin bir insan virusa tab gətirə bilir, lakin qarşısının alınması tədbirləri unudulmamalıdır.

Həkim həmçinin bildirib ki, tütün tüstüsünün tərkibində olan kanserogenlər badamcıq xərçənginə səbəb ola bilər. Bədəndə spirtin parçalanması zamanı meydana çıxan asetaldehid DNT hüceyrələrində də mutasiyaya səbəb olur.

Xəstəliyin simptomlarına boğazda düyün hissi, nəfəsdən kəskin qoxu, tüpürcəkdə qan və ya irin, səsin xırıltısı, həmçinin yemək udmasında çətinlik daxildir.