Hematuriya sidikdə adi gözlə görünən və ya yalnız mikroskop altında aşkar edilən miqdarda qanın olmasıdır. Bu, sadəcə bir əlamətdir və mütləq diqqətə alınmalıdır. Çünki hematuriya bir çox xəstəliyin simptomu ola bilər.

Aztibb.az xəbər verir ki, “Caspian International Hospital”ın mütəxəssisləri xəstəliyin bəzi mümkün səbəblərini sadalayıb:

Sidik yollarının infeksiyaları: Böyrəklərin, sidik kisəsinin və ya sidik kanallarının infeksiyası hematuriyaya səbəb ola bilər.

Böyrək və ya sidik kisəsi daşları: Daşlar qan damarlarına zərər verə və qanaxma yarada bilər.

Travma: Böyrəklərin, sidik kisəsinin və ya sidik yollarının zədələnməsi hematuriya ilə nəticələnə bilər.

Böyrək xəstəlikləri: Qlomerulonefrit və ya polikistik böyrək xəstəliyi kimi müxtəlif böyrək xəstəlikləri hematuriya ilə əlaqəli ola bilər.

Xərçəng: Böyrək xərçəngi, sidik kisəsi xərçəngi və ya sidik sistemindəki digər şişlər qanaxma verə bilər.

Qan dövranı pozğunluqları: Bəzi qan dövranı pozğunluqlarının hematuriya ilə nəticələnməsi mümkündür.

Əgər hematuriyadan şübhələnməyə əsas varsa və ya sidiyin rəngində dəyişikliklər müşahidə olunursa, diaqnoz üçün mütləq həkimə müraciət etmək və səbəbi müəyyənləşdirmək məsləhət görülür.

Hematuriyanın səbəbini aydınlaşdırmaq və müvafiq müalicəni təyin etmək üçün tibbi müayinə, o cümlədən sidik analizi, ultrasəs, KT və digər testlər tələb oluna bilər.