Alimlər kapilyar damarlarda qanın laxtalanmasını COVID-19-un ağır formasının əlaməti kimi qəbul ediblər. Tədqiqatın nəticələri Journal of Applied Physiology jurnalında dərc olunub.

Aztibb.az “Lifehacker” portalına istinadən xəbər verir ki, mütəxəssislər ilk dəfə qan damarlarının daxili səthini əhatə edən endotelin zədələnməsini və infeksiya nəticəsində yaranan trombotik hadisələri təsvir ediblər.

Məlum olub ki, kəskin iltihabın ağciyərlərdə mikrovaskulyar dövriyyəyə təsiri COVID-19-un ağır gedişində əsas amildir.

Tədqiqatçılar virusun 2020-ci ilin mart və may ayları arasında xəstəxanaya yerləşdirilən ağır COVID-19 xəstələrindən alınan ağciyər endotel hüceyrələrinə təsirini müşahidə etmək üçün ötürücü və skan edən elektron mikroskopiyadan istifadə ediblər.

Bütün hallarda, trombotik mikroangiopatiyanın yüksək yayılması - kiçik arteriyalarda və kapilyarlarda mikroskopik qan laxtalanması müşahidə edilib.