Qəbizlik, depressiya, həmçinin sidik yollarının infeksiyaları və sidik kisəsinin iltihabı sağalmaz otoimmun xəstəliyin, dağınıq sklerozun ilkin əlamətləri arasındadır.

Aztibb.az “Daily Mail”ə istinadən xəbər verir bu barədə Sorbonna Universitetinin nevroloqu Selin Loipre xəbərdarlıq edib.

Mütəxəssisin sözlərinə görə, dağınıq skleroz diaqnozu qoyulmuş xəstələrin 20 min tibbi qeydini təhlil etdikdən sonra məlum olub ki, onlar diaqnoz qoyulmazdan əvvəl dağınıq sklerozu olmayan insanlardan 50% daha çox qəbizlikdən şikayət ediblər.

Bundan əlavə, ilkin mərhələdə onların sidik yollarının infeksiyalarının inkişaf riski 38%, reproduktiv sistem pozğunluqları - 37%, depressiya - 22% və sidik kisəsi infeksiyaları - 21% daha yüksək olub.

Elmi işin müəllifi qeyd edib ki, sadalanan simptomlar onlarda xəstəliyin digər, daha aşkar əlamətləri olan bulanıq görmə, həssaslığın itirilməsi, yeriməkdə çətinlikdən beş il əvvəl yarana bilər.

Eyni zamanda, nevropatoloq vurğulayır ki, qəbizlik, depressiya və infeksiyalar başqa səbəblərdən də yarana bilər və onların mövcudluğu dağınıq sklerozun inkişafını birbaşa göstərmir. Ancaq bir insanın bu ağır otoimmun xəstəliyə irsi meyli varsa, bu simptomlar haqqında daha dolğun məlumat mütəxəssisə düzgün diaqnoz qoymağa kömək edəcəkdir.