Naxçıvanda səhiyyə sistemində aparılan islahatlar bəhrəsini verir, yaradılmış sərait xarici investorları Naxçıvan səhiyyəsinə investisiya qoymağa təşqiv edir.

Muxtar respublikanın Səhiyyə Nazirliyinin mətbuat xidmətindən Aztibb.az-a verilən məlumata görə, ilk addımda xarici investor səhiyyəyə 5 milyon manat kapital qoyuluşuna nail olunub.

“Dövlət-özəl tərəfdaşlığı haqqında” 9 dekabr 2022-ci il tarixli Azərbaycan Respublikasının Qanununa əsasən Naxçıvan Muxtar Respublika Xəstəxanası publik hüquqi şəxsi və EXON Biomedikal Sağlıq Xidmətləri Sənaye və Ticarət Anonim Şirkəti arasında bağlanan müqaviləyə görə şirkət tərəfindən tam avtomatlaşdırılmış rejimdə fəaliyyət göstərəcək beynəlxalq akkreditasiyalı laboratoriya qurulur.

Laboratoriyada klinik laborator diaqnostikasının bütün sahələri üzrə keyfiyyətli və dəqiq xidmət göstəriləcək. Laborarotiyanın test qruplarına biokimya, immunologiya, genetik, hematologiya, mikrobiologiya, patositologiya, molekulyar, seroloji, vitaminlər və dərman səviyyələri yoxlamaları, həmçinin digər testlər daxildir.

Bununla da sakinlər doğma diyarlarından kənara çıxmadan beynəlxalq akkreditasiyaya sahib yüksək səviyyəli laborator xidmətlərlə təmin olunacaqlar. Laboratoriyada mütəxəssis həkimlər xidmət göstərəcək. Müqaviləyə əsasən, burada 20-yə yaxın yeni iş yeri açılacaq, həmçinin laboratoriyanın mütəxəssis həkimləri Naxçıvanda təcrübəli laborantların yetişdirilməsi üçün könüllü təlimlər keçəcəklər.

Naxçıvanda laboratoriya xidmətinə qoyulan bu investisiya burada keyfiyyətli tibbi xidməti təmin etməklə bərabər, regionda səhiyyənin inkişafı naminə ümumi maraqların təmin olunmasında əhəmiyyətli rol oynayacaq.