Qrip peyvəndi infarkt riskini 26% azalda bilər. Tədqiqatçılar orta yaşı 61 olan 9059 xəstənin məlumatlarını təhlil ediblər. Onlardan 4529-u qripə qarşı peyvənd, qalanları isə plasebo alıb.

Aztibb.az xəbər verir ki, “Scientific Reports” hesabatına görə, onlar orta hesabla doqquz ay izlənilib.

Bu müddət ərzində peyvənd olunmuş 86 xəstə və plasebo qrupunda 116 nəfər infarkt keçirib. Peyvənd edilmiş insanların infarkt keçirmə ehtimalı 26%, ürək-damar xəstəliklərindən ölmə ehtimalı isə 33% azalıb.

Qrip infeksiyası damarlarda yağların və xolesterolun yığılmasına kömək edən sistemik iltihaba səbəb ola bilər. Bundan əlavə, qrip bir insanı ikincil infeksiyalara qarşı daha həssas edə bilər ki, bu da iltihabı pisləşdirə bilər.

Tədqiqat mövsümi qripə qarşı peyvəndlərin xüsusilə 65 yaşdan yuxarı insanlar, hamilə qadınlar və astma, şəkərli diabet, ürək və böyrək xəstəlikləri kimi xroniki xəstəlikləri olan xəstələr üçün vacib olduğunu təsdiqləyir.