Avstraliyanın səhiyyə naziri Mark Butler gənclərdə nikotin asılılığını azaltmaq üçün yanvarın 1-dən etibarən birdəfəlik elektron siqaretlərin idxalına qadağa qoyulacağını açıqlayıb.

Aztibb.az “Haberturk” saytına istinadən xəbər verir ki, nazir M.Butler qadağa ilə bağlı açıqlamasında belə deyib: “Elektron siqaretlərin aradan qaldırılması üçün növbəti addımları atırıq.

Biz avstraliyalıları, xüsusən də gəncləri vapinq və nikotin asılılığının zərərlərindən qorumağa sadiqik. Avstraliyanın bütün səhiyyə nazirləri vapinqə qarşı ardıcıl milli reaksiya haqqında razılığa gəlib. Yanvarın 1-dən biz birdəfəlik elektron siqaretlərin idxalını qadağan edəcəyik.

Butler, Xüsusi Giriş Proqramı üzərində də çalışdıqlarını və həkimlərin və tibb bacılarının tibbi ehtiyac olduqda müalicəvi elektron siqaretlərdən istifadə üçün reseptlər yaza biləcəklərini vurğulayıb.