Limfoma ağ qanın bir komponenti olan, bir növü olan limfositlərin formalarını dəyişərək kontrolsuz şəkildə artıb-çoxalıb limfatik orqanlarda, limfa düyünlərində, dalaqda, mədədə, bağırsaqda, ağciyərdə, qaraciyərdə, beyində, sümükdə, dəridə və s. toplanması nəticəsində yaranan onkoloji xəstəlikdir.

Aztibb.az xəbər verir ki, hematoloq Minurə Abışovanın bildirdiyinə görə, bu xəstəliyin səbəbi tam olaraq bilinmir. Səbəb ola biləcək faktorlar arasında əksər insanlarda mədədə rast gəlinən helikobakter pilor adlanan infeksiya var.

Bundan əlavə, xəstəliyə Hepatit C virusu, Epşteyn-Barr virusu, insan linfotrafik virusu və QİÇS virusu səbəb ola bilər.
Həkim qeyd edib ki, bu kənd təsərrüfatında çalışan insanlarda da ola bilər və ya meyvə, tərəvəzdən istifadə edən hamıda, əgər yaxşı yuyulmasa, pestisidlər qidalarda qaldıqda, bunlar da limfoma, leykoz kimi digər onkoloji xəstəliklər yarada bilirlər.

Ümumiyyətlə limfoma diaqnozu orqandan həmin toxumanın bir hissəsinin və ya tamamilə çıxarılaraq biopsiyaya verilməsi ilə qoyulur.

Hematoloq xəstəliyin müalicəsində kimyaterapiyadan, radioterapiyadan və immunoterapiyadan istifadə olunduğunu deyib. Vaxtında müraciət etmək, xəstəliyi kontrol altında saxlamaq baxımından vacibdir.