İstanbuldakı xəstə sayı Türkiyədə ümumi yoluxanların 40 faizini təşkil edir. Bu, ölkədəki ümumi vəziyyətlə bağlı daha çox narahatlıq yaradır. Risk mövsüm şərtləri səbəbindən gedərək artacaq.

Aztibb.az xəbər verir ki, bu fikirləri Türkiyənin Səhiyyə naziri Fahrettin Koca İstanbul Valiliyində şəhərdəki COVID-19-la bağlı son vəziyyətlə əlaqədar keçirilən toplantı zamanı bildirib.

İstanbulun dünyanın ən sıx şəhərləri arasında 14-cü yerdə olduğunu deyən nazir bunun virusun yayılması baxımından problem yaratdığını söyləyib.

Artım nisbəti İstanbulun 11 rayonunda 50-60, 10 rayonunda 60-70, yeddi rayonunda isə 70-80 faizdir. Bunun ən əsas səbəbləri isə tədbirlərin yumşalması və əhalinin tətillərdən şəhərə qayıtmasıdır. Bu səbəbdən ictimai nəqliyyatda, iş saatlarında tənzimləmələr, bəzi sahələr üzrə distant iş qrafikinə keçid nəzərdə tutulur.

Qeyd edək ki, Türkiyədə son sutka ərzində 2198 nəfər koronavirusa yoluxub, 75 nəfər isə bu virus səbəbindən ölüb.