Ümumdünya Səhiyyə Təşkilatı (ÜST) və ABŞ Xəstəliklərə Nəzarət və Qarşısının Alınması Mərkəzlərinin (CDC) yeni hesabatına əsasən, qızılcaya yoluxma halları və ölüm halları 2021-2022-ci illər arasında kəskin şəkildə artıb.

Aztibb.az “TRT Haber”ə istinadən xəbər verir ki, CDC-nin həftəlik hesabatının bir hissəsi olaraq dərc edilən araşdırma, qızılcaya yoluxma hallarının təxmin edilən sayında 18 faiz artım olduğunu ortaya qoyub.

Həmçinin qızılcadan ölənlərin sayının 43 faiz artdığı bildirilib. Beləliklə, ölənlərin sayı 95 mindən 136 minə yüksəlib.

Tədqiqatda "böyük və ya dağıdıcı qızılca epidemiyaları" barədə məlumat verən ölkələrin sayı da nəzərə alınıb. Məlumatlara görə, bu rəqəm 22-dən 37-yə yüksəlib, bu da yüzdə 68 artım deməkdir.

"Qızılca xəstəliyinin yayılması və ölüm hallarının artması təəccüblüdür, lakin son bir neçə ildə peyvənd nisbətlərinin azaldığını nəzərə alsaq, təəssüf ki, gözlənilməz deyil", – deyə CDC rəsmisi John Vertefeuille bildirib.

"İstənilən regionda qızılcaya yoluxma halları insanların qeyri-adekvat peyvənd olunduğu bütün ölkələr və icmalar üçün risk yaradır. Qızılca xəstəliyinin yayılmasının və ölüm hallarının qarşısının alınması üçün təcili, məqsədyönlü səylər vacibdir", - Vertefeuil əlavə edib.

ÜST-ün vaksinlər və biologiya direktoru Dr. Kate O'Brien bildirib ki, uşaqların yaşadıqları yerdə qızılca peyvəndi ilə qorunmaq hüququ var.