Kaliforniya Universitetinin alimləri tərəfindən aparılan bir araşdırma eşitmə itkisinin beynin səsin işlənməsi və diqqətdən məsul olan bölgələrində dəyişikliklərə səbəb ola biləcəyini müəyyən edib. Hansı ki, bu, demansın inkişafına səbəb ola bilər.

Aztibb.az “Alzheimer's Disease” jurnalında tədqiqatla bağlı dərc edilən hesabata istinadən xəbər verir ki, araşdırmada eşitmə qüsurlu insanlar da daxil olmaqla 130 nəfər iştirak edib.

Elm adamları subyektlərin sağlamlıq vəziyyəti haqqında məlumat toplayıb və beynin strukturunda patoloji dəyişiklikləri izləmək üçün maqnit rezonans görüntüləmə (MRT) aparıblar. Eşitmə pozğunluğunun dil emalı ilə əlaqəli temporal və frontal lobların eşitmə sahələrində, eləcə də diqqət üçün cavabdeh olan beyin sahələrində mikrostruktur dəyişikliklərə səbəb olduğu görülüb.

Alimlərin qənaətinə görə, bu cür dəyişikliklər demensiyanın inkişaf riskini artıra bilər. Bu, ilk növbədə ətraf mühitin səslərini eşitməyə və insan nitqini başa düşməyə çalışmaq üçün əlavə zehni səy göstərmək ehtiyacı ilə bağlıdır.

Bu cür hərəkətlər beyni həddindən artıq yükləyə bilər. Lakin bu əlaqənin altında yatan mexanizmlər hələ tam başa düşülməyib.

Qeyd edilib ki, eşitmə aparatlarından istifadə etmək, altyazılı televizora baxmaq və insanlarla sakit mühitdə danışmaq eşitmə qabiliyyətini itirmiş insanlarda demans inkişaf riskini azalda bilər.