Türkiyənin səhiyyə naziri Fahrettin Koca bildirib ki, ağrıları kəsmək, virus infeksiyalarını müalicə etmək üçün antibiotik istifadə etmək yanlışdır. Unutmaq olmaz ki, antibiotiklər yalnız bakteriyalara qarşı təsirlidir.

Aztibb.az “TRT Haber”ə istinadən xəbər verir ki, nazirin sosial media hesabından etdiyi paylaşımda antibiotiklərdən şüurlu şəkildə istifadə edilməsi vurğulanıb.

Antibiotiklərin şüurlu şəkildə istifadə edilmədiyi təqdirdə bakteriyaların yaratdığı xəstəliklərə qarşı müqavimət qazanacağına və müalicə müddətində təsirsiz hala düşəcəyinə diqqət çəkən nazir bunları deyib:

"Bu şərtlər arasında ölümlə nəticələnən xəstəliklər də var. Qızdırmanı azaltmaq, ağrıları aradan qaldırmaq, virus infeksiyalarını müalicə etmək üçün antibiotiklərdən istifadə etmək düzgün deyil. Unutmaq olmaz ki, antibiotiklər yalnız bakteriyalara qarşı təsirlidir. Antibiotiklər həkim tövsiyəsi ilə qəbul edilir. İnfeksiyanı ən təsirli şəkildə müalicə etmək üçün və müqavimət riskini azaltmaq üçün düzgün dozada, düzgün şəkildə və reseptə uyğun fasilələrlə istifadə edilməlidir. Antibiotiklərin şüursuz istifadəsi bu gün bütün dünyada ictimai sağlamlıq probleminə səbəb olur”.