Uroloq Andrey Smernitski kişilərdə libidonun (ehtiras) azalmasının gizli səbəblərindən danışıb və dərmanlardan istifadə etmədən kişilərin sağlamlığını bərpa etmək üçün məsləhətlər verib.
Aztibb.az "Discover 24” portalına istinadən xəbər verir ki, mütəxəssisin bildirdiyinə görə, kişilərdə cinsi istəyə bir çox faktorlar, o cümlədən xroniki stress, yuxusuzluq, siqaret, spirt və nizamsız cinsi həyat təsir edir.
Həkim kişilərin sağlamlığının yaxşılaşdırılması üçün bəzi sadə tövsiyələr verib, testosteron səviyyəsinin əsas rol oynadığını qeyd edib. Problemlərin bir göstəricisi bel ətrafının 94 sm-dən çox olması ola bilər.
Həkim izah edib ki, testosteron səviyyəsinin artırılması həm dərman müalicəsi, həm də təbii yolla əldə edilə bilər. O, ilk növbədə siqaretdən, spirtdən (pivə daxil olmaqla) imtina edərək və gündəlik iş rejimini tənzimləyərək həyat tərzində dəyişiklik etməyi məsləhət görüb. Fiziki fəaliyyət də mühüm amildir.
Tədqiqatlar göstərib ki, 12 həftə ərzində intensiv məşqlər testosteron səviyyəsini 36% artıra bilər. Odun doğramaq kimi bir saatlıq məşq testosteron səviyyəsini 48% artırır. Həmçinin 12 həftə ərzində stasionar velosipeddə gündəlik 15 dəqiqəlik fırlanma testosteron səviyyəsini 17% artıra bilər.