Çin sakini səhhətində ciddi problemlərdən qorxaraq şəkəri yüksək olan qidalardan imtina edib və 50 kiloqram arıqlayıb.

Aztibb.az xəbər verir ki, bu barədə “South China Morning Post” öz materialında məlumat yayıb.

Quandun əyalətində yaşayan 36 yaşlı Minq soyadlı çinlinin çəkisi 120 kiloqram olub. Onun adi pəhrizi çoxlu dondurma və şirin sodadan ibarət idi. Onun sözlərinə görə, şəkəri yüksək olan qidalar ona həyatındakı stresli vəziyyətlərin öhdəsindən gəlməyə kömək edib.

Bu həyat tərzi nəticəsində kişi daxilində ağrılar, üzündə uyuşmalar və tez-tez başgicəllənmələrdən əziyyət çəkməyə başlayıb. Həkimlər ona qaraciyərin alkoqolsuz piylənməsi və 20-yə yaxın müxtəlif patologiya diaqnozu qoyublar.

Lakin müayinənin nəticələri Minqi çox da narahat etməyib və o, adi həyat tərzinə davam edib. Lakin piylənmədən əziyyət çəkən tanışının ölümündən sonra Minq həyat tərzini dəyişməyə qərar verir.

O, şəkəri yüksək olan qidaların istehlakını tamamilə dayandırır və iki il ərzində 50 kiloqram artıq çəkidən qurtula bilir.

Minqin fotosunu internetdə izləyən istifadəçilər onun 20 yaş cavan görünməyə başladığını da yazıblar.