Pnevmoniyanın ən çox görülən əlamətləri qızdırma, öskürək, bəlğəm əmələ gəlməsi və sinə ağrısıdır. Xəstəlik zamanı nəfəs darlığı, huşunu itirmə, ürəkbulanma-qusma, tez-tez nəfəs alma, əzələ-oynaqlarda ağrı və zəiflik də müşahidə oluna bilər.

Aztibb.az “CNN Türk”ə istinadən xəbər verir ki, xalq arasında “sətəlcəm” xəstəliyi kimi tanınan pnevmoniya ağciyər toxumasına təsir edən, viruslar, daha nadir hallarda isə göbələklər səbəbiylə inkişaf edən yoluxucu bir xəstəlikdir.

Sətəlcəm bütün dünyada böyüklər və uşaqları təsir etsə də, dünyada ən çox Cənubi Asiya və Afrikada yayılıb.

Adətən antibiotik, bol maye qəbulu, istirahət, ağrıkəsici və qızdırma salıcı kimi müalicələrdən istifadə edilir.

Lakin xəstəxanaya yerləşdirilməli olan xəstələrdə fərqli müalicələr tələb oluna bilər. Çox ağır pnevmoniya vəziyyətlərində reanimasiya xəstəxanasına yerləşdirmə və tənəffüs dəstəyi tələb olunur.

Pnevmoniyaya səbəb olan mikrobun müəyyən edilməsi ən vacib məsələdir. Lakin sətəlcəm diaqnozu qoyulduqdan sonra ən qısa zamanda antibiotik müalicəsinə başlanılmalıdır. Ona görə də şərtlər nəzərə alınaraq antibiotik müalicəsinə başlanılır. Bəlğəmdə hər hansı mikrobun izlərinin aşkarlanması və bu mikrobu müalicə etmək üçün hansı antibiotikdən istifadə oluna biləcəyinə dair məlumatlar əldə edilir.