SARS-CoV-2 hissəciyinin süni analoqu lüminesans molekullardan istifadə edilərək işıqlandırılıb və ətraflı tədqiq edilib.

Aztibb.az “ACS Nano” jurnalında tədqiqatla bağlı dərc olunan məqaləyə diqqət çəkib.

Alman molekulyar bioloqları aşkar ediblər ki, vezikulyar stomatit virusu virus patogenlərinin insan və heyvan hüceyrələrinə necə nüfuz etdiyini öyrənmək üçün universal vasitə kimi istifadə edilə bilər.

"Klik kimyası metodlarından istifadə etməklə yaradılmış psevdoviruslar hüceyrə və virusların qarşılıqlı əlaqəsini öyrənmək üçün böyük potensiala malikdir. Onların yaradılması bəşəriyyətin ilk mikroskopların yaradılmasından sonra görünməyən mikro-cisimlər aləmini necə kəşf etdiyi ilə müqayisə edilə bilər", - elmi qrupun rəhbəri bildirib.

Qeyd edək ki, pseudovirus sistemi SARS-CoV-2 kimi patogen viruslara qarşı peyvəndləri effektiv və təhlükəsiz şəkildə yoxlaya bilən faydalı alternativ yanaşmadır.

Tədqiqatın aparıldığı Vürzburq Universitetinin alimlərininb qeyd etdiyi kimi, onların yaratdığı yanaşma ən real psevdovirusları yaratmağa imkan verir. Elm adamları bunu təbii patogenlər kimi hüceyrələrə nüfuz edə bilən virus zülallarının və digər molekulların üçölçülü konstruksiyaları adlandırırlar.

Bu cür strukturlar virusları öyrənmək üçün uğurla istifadə edilib. Lakin virusun hüceyrələrə yoluxma qabiliyyətini pozmadan onlara parlaq molekulları əlavə etmək çox çətindir.

Bu, alimlərin virusların hüceyrələrə necə daxil olduğunu və bu prosesdə xüsusi zülalların hansı rol oynadığını dəqiq müşahidə etməyi çətinləşdirir.