ABŞ-dan olan nevroloqlar hesab edirlər ki, beynin qocalması ən sürətlə subay insanlarda və gecə işləmək məcburiyyətində olanlarda baş verir.

Aztibb.az xəbər verir ki, amerikalı nevroloqlar Zaldi Tan və Randall Rayt “HuffPost”a müsahibəsində qeyd etdikləri kimi cəmiyyətdən təcrid olunmaq zehnin çevikliyinə mənfi təsir göstərir. Ünsiyyətdən məhrum olan insan informasiyanı effektiv emal etmək qabiliyyətini itirir ki, bu da ən sadə gündəlik qərarları belə qəbul etməyi çətinləşdirir.

Müsahibədə bildirilir ki, beyin funksiyalarında disbalans var, zəruri təcrübədən məhrum olan sinir yolları zəifləyir. Diqqət dağılmağa başlayır ki, bu da öz növbəsində koqnitiv funksiyaların aşağı düşməsini sürətləndirir.

Zehni qabiliyyətlərin azalmasının digər amilləri də var - gecə işləmək və oturaq həyat tərzi. Normal yuxu beynin yenilənməsinə və toksinlərdən təmizlənməsinə kömək edir, lakin yuxunun olmaması və sirkadiyalı ritmlərin pozulması bu prosesləri çətinləşdirir. Alzheimer xəstəliyinin inkişafı üçün xarakterik olan proseslərə bənzərlik inkişaf edir.

Qan təzyiqindəki dalğalanmalar, yeni şeylər öyrənmək və inkişaf etmək istəməməsi də demensiyaya səbəb olur. Buna görə də, təhsil səviyyəsi yüksək olan insanlarda neyrodegenerativ xəstəliklərə daha az rast gəlinir.