Braziliyanın Minas Gerais Federal Universitetinin (UFMG) alimləri kokain asılılığı ilə mübarizə üçün nəzərdə tutulmuş “Calixcoca” peyvəndinin uğurlu sınaqlarının başa çatdığını elan ediblər.
Aztibb.az “Planet Today” nəşrinə istinadən xəbər verir ki, insanlarda növbəti klinik sınaqların bu peyvəndin effektivliyini təsdiq edəcəyi gözlənilir.
Peyvənd kokain molekullarının qana daxil olmasına mane olan anticisimlərin istehsalını stimullaşdırır.
Tədqiqatçılar həmçinin qeyd ediblər ki, peyvəndin təsirləri təcrübələrdə istifadə edilən siçanların nəsillərində belə davam edir ki, bu da peyvəndin doğulmamış uşaqları kokain asılılığından qorumaq potensialını göstərir.
Bununla belə, elm adamları xəbərdarlıq edir ki, “Calixcoca” peyvəndi əhəmiyyətli potensiala malik olsa da, xəstələrin tam və effektiv şəkildə sağalmasını təmin etmək üçün ənənəvi reabilitasiya üsulları ilə birlikdə istifadə edilməlidir.