London Kral Kollecinin alimləri astmanın altında yatan yeni molekulyar səbəbləri aşkar ediblər.
Aztibb.az “Frontiers in Cell and Developmental Biology” jurnalına istinadən xəbər verir ki, təqdim edilən araşdırma, mRNT-ni tənzimləyən müəyyən zülalların bu xəstəliyin inkişafında mühüm rol oynadığını açıq şəkildə göstərib.
Tədqiqatçılar astması olan və ya olmayan xəstələrin hüceyrələrində RNT ilə əlaqəli genetik məlumatları diqqətlə araşdırıblar. RNT DNT-dən genetik məlumat daşıyan əsas molekuldur. Bundan əlavə, RNT daha sonra hüceyrələrin və digər molekulların tikinti blokları olan zülallara çevrilə bilər. Təhlil göstərib ki, bu funksiyasını tənzimləmək üçün RNT-yə bağlanan iki zülal (ZFP36L1 və ZFP36L2) var.
Buna görə tədqiqatçılar ağır astması olan xəstələrin tənəffüs yollarında ZFP36L1 və ZFP36L2 zülallarının konsentrasiyasını normallaşdırdıqda, astmaya səbəb olan iltihab reaksiyalarını idarə edən genlərin ifadəsində dəyişikliklər baş verib. Başqa sözlə, ZFP36L1 və ZFP36L2 astmada iltihabla əlaqəli genlərin tənzimləyicisi kimi fəaliyyət göstərib.
Bu tədqiqat işi astmanın inkişafında RNT ilə qarşılıqlı əlaqədə olan zülalların rolunun müəyyən edilməsində ilk addımdır. Gələcəkdə bu sahədə əlavə tədqiqatların aparılması planlaşdırılır. Nəticələr təsdiqlənərsə, bu, bu xəstəliyin müalicəsi və qarşısının alınması üçün yeni yanaşma olacaq.