ABŞ və Cənubi Afrika Respublikasında Qazanılmış İmmunçatışmazlığı Sindromuna (QİÇS) səbəb olan İnsan İmmunçatışmazlığı Virusuna (İİV) qarşı yeni profilaktik peyvəndin Faza-1 tədqiqatlarına başlanılıb.

Aztibb.az xəbər verir ki, ABŞ Səhiyyə və İnsan Xidmətləri Departamentinin Milli Sağlamlıq İnstitutunun (NIH) verdiyi açıqlamaya görə, "VIR-1388" adlı bu peyvəndin təhlükəsizliyini və onun təsir qabiliyyətini qiymətləndirmək üçün 1-ci mərhələ peyvənd prosesi başladılıb. Bu insanlarda HİV-ə qarşı immunitet təmin edəcək.

ABŞ-da 6 müəssisədə və Cənubi Afrikada 4 sahədə həyata keçirilən birinci faza birinci doza peyvəndləri İİV daşıyıcısı olmayan 95 könüllü ilə aparılacaq.

Açıqlamada Faza-1 mərhələsinin ilk nəticələrinin 2024-cü ilin sonunda alınacağı, könüllülərin ilk peyvənddən sonra 3 il izlənəcəyi bildirilib.

Qeyd edilib ki, yeni peyvənd 2004-cü ildən hazırlanıb və NIH tərəfindən maliyyələşdirilir.

Cənubi Afrika Respublikası dünyada HİV-ə yoluxma hallarının ən çox olduğu ölkədir.

Milli Yoluxucu Xəstəliklər İnstitutunun (NICD) məlumatına görə, ölkədə təxminən 7,7 milyon HİV daşıyıcısı var.

Ümumdünya Səhiyyə Təşkilatının (ÜST) məlumatlarına görə, 2022-ci ilə qədər dünyada təxminən 39 milyon insan HİV-ə malikdir. Dünyada hər 5 HİV daşıyıcısından biri Cənubi Afrikada yaşayır.