Dünyanın əksər ölkələrində hava təhlükəli dərəcədə çirklənmişdir və şəhərlərin yalnız kiçik bir hissəsi ekoloji standartlara cavab verir.

Aztibb.az xəbər verir ki, bu barədə IQAir-in hesabatına istinadən "Associated Press" məlumat yayıb.

Mütəxəssislər 138 ölkədəki 40 000 monitorinq stansiyasının məlumatlarını tədqiq edərək müəyyən ediblər ki, ən yüksək çirklənmə səviyyəsi Çad, Konqo, Banqladeş, Pakistan və Hindistanda qeydə alınıb. Sonuncuya ən çox çirklənmiş 9 şəhərdən altısı daxildir və sənaye mərkəzi Birnihat antireytinqin lideri olub.

Mütəxəssislərin fikrincə, real vəziyyət daha da pis ola bilər, çünki bəzi rayonlarda monitorinq məntəqələri praktiki olaraq yoxdur. Məsələn, Afrikada bir neçə milyon insan üçün havanın keyfiyyətinə nəzarət edən yalnız bir cihaz var. Bununla belə, vəziyyət tədricən dəyişir - təkcə son bir ildə müxtəlif ölkələrdə minə yaxın yeni stansiya quraşdırılıb.

Sunway Planet Sağlamlığı Malayziya Mərkəzinin baş alimi Fatima Ahamad havanın çirklənməsinin tənəffüs xəstəlikləri, xərçəng və hətta Alzheimer xəstəliyi riskini artırdığını deyib.

ÜST hər il təxminən 7 milyon insanın havanın çirklənməsindən dünyasını dəyişdiyini təxmin edir.