Orhus Universitetinin tədqiqatçıları siqaretin depressiya və bipolyar pozğunluq riskinin artması ilə əlaqəli olduğunu aşkar ediblər.

Aztibb.az gazeta.ru-ya istinadən yazır ki, tədqiqatın nəticələri “Acta psychiatrica Scandinavica” jurnalında dərc olunub.

Müəlliflər 350 min insanın sağlamlıq məlumatlarını təhlil ediblər. Alimlərin sözlərinə görə, insanlar adətən 20 yaşından əvvəl siqaret çəkməyə başlayırlar, lakin orta hesabla 30-60 yaş arasında psixi xəstəliklərlə xəstəxanaya müraciət edirlər. Bundan əlavə, ən çox siqaret çəkənlərin xəstəxanalara düşdüyü ortaya çıxıb.

O da məlum olub ki, valideynlər siqaret çəkirsə, uşağın siqaret çəkmə riski artır. Müəlliflər insanın siqaret çəkmə ehtimalını artıran genləri müəyyən edə biliblər. Tədqiqatçılar bu genlərin psixi xəstəlik riski ilə əlaqəli ola biləcəyini irəli sürüblər.

“Bu model üçün başqa bir izahat ondan ibarətdir ki, siqaret beyində iltihaba səbəb ola bilər ki, bu da uzun müddətdə müxtəlif psixi pozğunluqlara yol açır. Lakin biz hələ dəqiq səbəbləri müəyyən etməmişik”, - deyə alimlər yekunlaşdırıblar.