Məlum olduğu kimi, Ümumdünya Səhiyyə Təşkilatı avqustun 3-də koronavirusun “Eris” kimi tanınan yeni variantının, EG.5.1-in sürətlə yayıldığını bildirib. Bu baxımdan koronavirusun yeni variantlarının göründüyü ölkələrdə COVID-19 peyvəndlərinin yenilənmiş versiyaları olduqca vacibdir. 

Aztibb.az medimagazin.com.tr-yə istinadla xəbər verir ki, ABŞ Qida və Dərman Administrasiyasının (FDA) və Xəstəliklərə Nəzarət və Qarşısının Alınması Mərkəzlərinin (CDC) rəsmilərinin bildirdiyinə görə, prezident Co Baydenin administrasiyası yenilənmiş COVID-19 peyvəndlərini sentyabrın ortalarında təqdim etməyi planlaşdırır. Hazırlanan vaksinlər virusun yeni variantını hədəfləmək üçün istehsal ediləcək.

Qeyd olunub ki, ABŞ-da COVID-19 səbəbiylə xəstəxanaya yerləşdirilənlərin sayında ciddi artım var. Həftəlik statistikaya əsasən, COVID-19 səbəbiylə xəstəxanaya yerləşdirilənlərin sayı 21,6 faiz artıb. İyun ayından bu yana 40 faiz artım müşahidə edilib.