Dünyada həkimlik qədər şəfalı, şəfqətli, xeyirxah və humanist peşə yoxdur. Bütün zamanlarda xalqlar arasında həkim cəmiyyətin ən çox sevilən və hörmət edilən təbəqəsi sayılıb, onların haqqında hikmətli sözlər yazılıb. Seçdiyi peşəsindən, həyatdakı işindən, mövqeyindən asılı olmayaraq, hər kəsin qəlbində bu sənət sahiblərinə qarşı ali hisslər yaşayır.

 

"Həkimlərimizi tanıyaq!" rubrikasında söz açacağımız Zenfira Səfərovada sevilən-seçilən həkimlərdən biridir. O, bu günədək mənalı həyatını bütünlüklə şərəfli işinə, müqəddəs peşəsinə, insanların sağlamlığına həsr edib.

 

Zenfira Həşimalı qızı Səfərova 21 oktyabr 1954-cü ildə Əli Bayramlı şəhərində anadan olub. 1971-1977-ci illərdə Azərbaycan Dövlət Tibb Universitetinin Müalicə profilaktika fakültəsində təhsil alıb. 1977-1978-ci illərdə 1 nömrəli Semaşka adına Klinik Xastəxanada internatura keçib.

 

O, 1978-ci ildə Əli Bayramlı Şəhər Mərkəzi Xəstəxanasının Terapiya şöbəsində həkim terapevt, 1989-cu ildə Kardiologiya şöbəsində həkim-kardioloq, 1995-ci ildə Rayonlararası Kardioloji mərkəzdə müdir vəzifələrində çalışıb.

 

08.02.2013 və 17.04.2018-ci illərdə Həkimlərin Sertifikasiya Şəhadətnaməsindən keçib.

 

2019-cu ildə Şirvan ŞMX-nın I Terapiya şöbəsində şöbə müdiri işləyib, 2021-ci ildən Terapiya şöbəsində həkim-kardioloq kimi fəaliyyətini davam etdirir.

 

Təcrübəli kardioloq 2000-ci ildə Ulu Öndər Heydər Əliyevin Sərəncamı ilə "Tərəqqi" medalı ilə təltif olunub.