Ağciyər Xəstəlikləri Mərkəzi tərəfindən “Vərəmin aşkarlanmasında ilkin səhiyyə xidmətinin rolu” mövzusunda növbəti təlim Qobustan Rayon Mərkəzi Xəstəxanasında keçirilib.

Bu barədə Aztibb.az-a Qobustan RMX-dan məlumat verilib.

Bildirilib ki, təlimdə tibb müəssisəsinin baş həkimi, Ailə Sağlamlığı Mərkəzinin, kənd Ailə Sağlamlığı Mərkəzlərinin, kənd tibb məntəqələrinin və kənd həkim məntəqələrinin həkimləri, terapevt və pediatrları, həkim-infeksionist, eləcə də tibb bacıları iştirak ediblər.

Təlim Ağciyər Xəstəlikləri Mərkəzinin İsmayıllı Regional Xəstəxanasının baş həkimi Anar Məmmədov tərəfindən keçirilib.

Təlim zamanı vərəmin erkən aşkarlanmasının əhəmiyyəti, risk qruplarının vaxtında müayinəyə cəlb edilməsi, vərəmə şübhəli halların düzgün qiymətləndirilməsi və pasiyentlərin ixtisaslaşdırılmış tibb müəssisələrinə operativ yönləndirilməsi məsələləri diqqətə çatdırılıb.

Həmçinin müalicəyə sadiqliyin artırılması, dərman vasitələrinin pasiyentlərə çatdırılması və VOT – videonəzarətli müalicə xidmətinin əhəmiyyəti barədə məlumat verilib.

Təlimdə ilkin səhiyyə xidməti ilə vərəm əleyhinə xidmət arasında səmərəli və əlaqələndirilmiş əməkdaşlığın vərəmin yayılmasının qarşısının alınmasında, xəstələrin vaxtında aşkarlanaraq müalicəyə cəlb edilməsində və müalicə nəticələrinin yaxşılaşdırılmasında mühüm rol oynadığı vurğulanıb.

Təlim təqdimat, sual-cavab sessiyası və qarşılıqlı fikir mübadiləsi formatında davam edib.