Sülh Aylığı çərçivəsində Qazax Rayon Mərkəzi Xəstəxanasının təşkilatçılığı ilə "Sülh və sağlamlıq" mövzusunda ümumi maarifləndirmə tədbiri baş tutub.

Xəstəxanadan Aztibb.az-a verilən xəbərə görə, tədbiri giriş sözü ilə açan Qazax RMX-nın direktoru Afiq Fərruxov vurğulayıb ki, tibb müəssisəsinə müraciət edən hər bir vətəndaşın sağlamlığı həkimlərimizə əmanətdir: "Xəstəxanaya ağrılı, qorxulu və narahat halda gələn vətəndaşlar üçün bizim vəzifəmiz təkcə onu müalicə etmək deyil, həm də ona ümid, təsəlli və hörmət verməkdir. Keyfiyyətli xidmətin 50%-i peşəkarlıq, 50%-i rəftardır. Bir gülümsəmə, bir xoş söz bəzən ən bahalı dərman qədər təsir edir."

Digər çıxış edənlər qeyd ediblər ki, güclü komanda yalnız bir-birini dəstəkləyən kollektivdə formalaşır. Biz rəqib deyil, ailəyik.

Tədbirdə xüsusilə ağır diaqnoz alan xəstələrə psixoloji dəstəyin müalicənin ayrılmaz hissəsi olduğunu bildirilib.Uşaqla işləyərkən səbirin, valideynə izah verərkən anlayışın nə qədər vacib olduğunu öz nümunələri ilə izah edilib.

Tədbir boyu açıq müzakirələr aparılıb, suallar cavablandırılıb.