Qobustan Rayon Mərkəzi Xəstəxanasında əməkdaşların peşəkar bilik və bacarıqlarının artırılması, pasiyentlərlə düzgün ünsiyyətin və etik davranış prinsiplərinin təkmilləşdirilməsi məqsədilə “Pasiyent məmnuniyyəti və etik davranış” mövzusunda təlim keçirilib.

Xəstəxanadan Aztibb.az-a verilən xəbərə görə, tədbirdə müəssisəsinin direktoru Günay Muradova çıxış edərək pasiyent məmnuniyyətinin təmin olunmasında əməkdaşların peşəkar və etik davranışının, pasiyentlərlə düzgün ünsiyyətin və müraciətlərə həssas yanaşmanın əhəmiyyətindən danışıb. Direktor mövzu ilə bağlı öz təcrübəsini bölüşərək əməkdaşlara dəyərli tövsiyələr verib.

Daha sonra təlim Xəstə xidmətləri şöbəsinin müdiri Kəmalə Zərbalıyeva tərəfindən davam etdirilib. Təlim zamanı pasiyentlərlə ünsiyyət zamanı etik davranış qaydaları, müraciətlərə düzgün yanaşma, pasiyent hüquqlarının qorunması, xidmət keyfiyyətinin yüksəldilməsi və pasiyent məmnuniyyətinin artırılmasında əməkdaşların rolu barədə ətraflı məlumat verilib.

Təlimdə tibb müəssisəsinin inzibati və tibbi heyəti, xüsusilə Xəstə xidmətləri şöbəsinin, Sığortanın təşkili və innovasiya şöbəsinin əməkdaşları iştirak ediblər.

Təlim interaktiv şəkildə keçirilib, mövzu ətrafında fikir mübadiləsi aparılıb və iştirakçıların sualları cavablandırılıb.